Ministra Edukasaun husu estudante finalista sira uza máskara iha ámbitu ezame nasionál

DILI

- 17 Outubru 2026

- 12:23 PM

Ministra Edukasaun, Dulce de Jesus Soares. Imajen TATOLI/Egas Cristóvão

DILI, 17 Outubru 2026 (TATOLI)–Ministra Edukasaun, Dulce de Jesus, husu estudante finalista sira-ne’ebé sei tuir Ezame Nasionál iha loron 19 Outubru atu uza máskara hodi hamenus risku ba saúde tanba ahi-suar ne’ebé to’o ona iha Timor-Leste.

Ministra Dulce de Jesus hato’o pedidu ne’e ba Diretór Servisu Edukasaun Munisipál, Superintendente Eskolár, Inspetór Eskolár no dirijente eskola sira, atu fó avizu ba estudante, profesór, vijilante no funsionáriu hotu ne’ebé envolve iha ezekusaun Ezame Nasionál atu uza máskara.

“Asuntu ne’ebé presiza ita fó atensaun sériu mak kondisaun ahi-suar ne’ebé to’o ona iha Timor-Leste. Situasaun ida-ne’e husu ita atu aumenta kuidadu ba impaktu ne’ebé bele afeta saúde, liuliu saúde respiratória,” Ministra Dulce de Jesus dehan ba TATOLI iha Komoro.

Nia hato’o pedidu ne’e atu asegura katak estudante sira no ema hotu ne’ebé envolve iha prosesu Ezame Nasionál bele proteje sira-nia saúde husi impaktu ahi-suar.

Ministra ne’e esplika, responsabilidade Ministériu Edukasaun la’ós de’it atu asegura prosesu ezame la’o ho orden no tuir prosedimentu, maibé mós atu tau prioridade ba saúde no seguransa ema hotu nian ne’ebé envolve iha atividade ne’e.

Tanba ne'e, nia husu ba entidade edukasaun sira atu aumenta kuidadu no fo orientasaun ba estudante finalista, profesoor no funsionáriu sira atu uza maskara durante prosesu ezame, hodi hamenus risku ba saude respiratoria.

Ezame Nasionál ba estudante finalista sira sei hahu iha loron 19 Outubru 2026. Total estudante finalista hamutuk 51.188 ne'e kompostu husi ensinu baziku iha 25.267, ensinu sekundáriu jerál iha 22.100 no ensinu sekundáriu tékniku-vokasionál 3.489 no mos ensinu rekorrente 332.

Enkuantu, sentru ezame nasionál hamutuk 552 ne'e ba ensinu baziku hamutuk 349, ensinu sekundáriu jerál hamutuk 150 no ensinu sekundáriu tékniku-vokasionál hamutuk 53.

Jornalista : Osoria Marques

Editor : Cancio Ximenes

Publicidade

Share